[RMVB]

首先概念：
中国人要从概念高头清醒过来，世博会是世博会，奥运会是奥运会。奥运会是李小龙，世博会顶多是李小
龙屋里隔壁卖盒饭个李小胖。

世博会讲穿仔，就是外头壳子交关噱头（英国馆顶灵），里头就是点电子屏咾图片咾外国人咾，啥地方看
勿到，到家乐福去也差勿多。

总结出来：展馆是外头比里头灵，人是里头比外头个灵。也就是里头个服务小姑娘比外头个志愿者灵，志
愿者读书读得忒多，作孽只只架梁。

其次路线：
4月24号礼拜六世博会预展30万人，浦西（D区E区）个入园速度比浦东（A区B区C区）快100倍！必过从浦西
入园，还想预约到中国馆、欧洲馆、亚洲馆等等热门馆，做梦去伐。

地铁入园，顶便当个是13号线。卢浦大桥站出来就是园子里头D区日本产业馆；世博大道站出来，就是园子
里头B区告C区当中。

浦西入园，顶便当个口子是地铁4号线、8号线个西藏南路站。地铁广播老是讲西藏南路站拥挤，叫阿拉鲁
班路站OR南浦大桥站下来，覅去睬伊，只要伊勿封站，照样跑！

第三吃饭：
吃饭告参观一样，勿是侬想到啥地方去就好去个。碰着啥展馆就看啥展馆，碰着啥饭馆就吃啥饭馆。园区
大来野来，侬要是挑挑拣拣，譬如像我，必过跑到十分之一，就头颈别筋脚抽筋。

越是贵个外国餐厅，物事越是难吃，外加还要排队。我个人建议，自家带点面包干点心去（园子里头也有
得买静安面包房），茶水勿用带，里头有直饮水，买饮料也勿贵，可口可乐3块（听装）4块（小瓶子），
别它价钿自家好推个。

PS：
想世博会辰光宁波白相去个朋友注意，五折门票个券交关隐蔽，辣海参观结束前头，宁波滕头案例馆出门
前头有“手写签名区”，看上去是白白相，必过出来个纸头就是打折券。盖章有效。我忘记盖章唻。罪过
，老鬼失撇。


大赠送——我今朝辣海里头吃了4只外国馆子。

C区，珍鼎非洲餐厅——底楼快餐，二楼自助餐。鸵鸟卷18块，羊肉卷15块，牛肉卷15块。物事赛过老早底
港汇广场里头个烤肉霸。鸵鸟也就搿点花头，味道就是老鸭肉+老牛肉。一只卷，一包薯条，一杯饮料，价
钿就要30块40块，呒啥意思。鸵鸟肉饭套餐，价钿就要50块朝上。里头一杯可乐8块。

C区，喜喜漫土耳其快餐厅——真个是叫慢！一塌刮子10个人，还要排队毛半个钟点，正式开园乃哪能办？
板煞死蟹一只。里头烤肉串一般15块左右一串，还算正宗，里头烤肉个只有一个中国人，别他4、5个侪是
土耳其人。勿用看面孔，看手高头个毛好唻。

C区，乌拉圭餐厅——乌龟拉爷叔。底楼块餐，二楼西餐厅。快餐一般59块，就是一只汉堡一杯饮料一点炸
薯块。号称牛肉是乌拉圭空运来个。乌拉圭牛肉又勿稀奇，阿拉屋里有瓶冰水还是南极洲运得来个唻。我
吃个套餐是几块牛肉加辣椒丝洋葱丝，8块左右炸薯块，温个，我也勿高兴开国语告伊多烦，还有一点
sauce，末脚是一杯饮料，可选矿泉水告可口可乐。十二万分拔伊个菜单图片晃点脱了。味道末，嘿嘿。客气点讲，还算好，就是物事忒少，牛肉只有5、6小块。厨房间里头侪是中国人，看伊拉打打闹闹。顶噱头是两个地方，一个是里头一杯可乐15块，我看牢伊外头小卖部拖进来个；二是只有台子呒没有位子，小鬼宣传我搿是老外个理念。没位子，总归一杯可乐勿值15块伐。没位子，是想叫人流动了快点，必过失败，今朝就我一家头，还等了十二分钟。我想告外国人讲，中国人坐辣海吃饭已经几千年了（包括席地），勿是侬一个外国人想搞就好搞个。朋友，帮帮忙噢！

C区，捷克餐厅——属于捷克主题馆里头的餐厅。一盆主菜，3-5片肉，价钿150-180块。甜品60块。啤酒小
瓶装40块。物事勿是老好吃，顶触气个是里头一个告捷克搭着点关系个中国女人，绝对假洋鬼子，面孔像煞
黄草纸（盖过个），占仔只靠窗高脚矮凳耀武扬威，歇歇勿停叫中国服务生过去训闲话，也勿顾有客人辣
海边浪吃饭，有趟当场摸出两把呒没揩清爽个叉子调羹。我低头看看自家个调羹，腻心啊。有趟“哇”叫
一声，我一吓，道是地震从青海震到上海

[anmedacn]

沙发